أنا والعذاب وموبينيل!

حظي العثر أني من عملاء موبينيل (للأسف حتى هذه اللحظة التي أتمنى ألا تدوم).. بقالي يجي 13 سنة من شهداء هذه الخدمة.. من أول ما قالوا يا (ألو) كنت واقفة في الصف الأول ويا عيني عليا لما دفعت 1500 جنيه علشان اخد السيم كارد اللي كان سبب في تعاستي النهاردة!
طبعا هيجي حد ويقول لي ايه اللي صبرك 13 سنة على المر ده..هاقول له عادي زي اللي صبر الشعب كله على مبارك 30 سنة!
ماعلينا وبلاش نتكلم في الماضي علشان الماضي والحاضر مع موبينيل كله بجد جراح!
طبعا دي مش أول مرة تحصل لي مشكلة مع رافعة الضغط الأولى، قاهرة أحلى الأوقات والقاضية على النوم في سبات.. الشركة الأولى في تطفيش العملاء.. الحائزة على المركز الأول بجدارة.. موبينيل.


لا حول ولا قوة إلا بالله.


معلش بس باخد نفسي.. أصلي بجد من امبارح وأنا محروق دمي بزيادة.. هو أنا طبعا دمي محروق من اسبوعين بس امبارح تحديدا خلصوا على الجزء السليم في اعصابي


غلطة عمري اني فكرت أحول من (ألو) إلى (ستار كونترول).. وقال بيقول لك (اتكلم واتحكم) هو تقريبا يقصد اتكلم واتحكم في اعصابك ماتفقدهاش لما نشلك بسوء الخدمة وضياع المعلومات وتوهان الموظفين والمديرين واخطاء الفنيين وأوعى تخبط دماغك في الحيط لا تنزل دم وتوسخ لنا الفرع!


جملة (اتكلم واتحكم) فكرتني بمهيب الذكر، العظيم عبقري زمانه، فنان الجيل (عمرو مصطفى) لما بيقول لك "اتكلم واشرب".. الراجل ده طلع بيفهم بس كنا ظالمينه.. بس هو عنده لخبطة شوية.. حود على شركات المشروبات بدل موبينيل.. بس هو أكيد كان يقصد موبينيل.. أنا تأكدت امبارح


أنا شربت فعلا المر معاهم.. قدمت الطلب للتحويل وقالوا لي بمنتهى البساطة "في خلال 24 ساعة.. لا خليها بحد أقصى 48 ساعة خطك هيتحول" 
والله ماكنت اعرف انه هيتحول لخط عديم القيمة.. ماحدش نبهني.. ماعلينا!


سـألت بس سؤال للعلم.. ياترى رصيدي الموجود هيحصل فيه ايه.. رد الموظف بكل ثقة.. مافيش أي مشكلة هيتحول لحضرتك مع الخط لأن عادي الخط بعد الدقايق المجانية بيتشحن فهيعتبر الرصيد ده أكننا شحنا.. قلت حاجة عظيمة جدا!


بحسن نية صدقتهم.. ولقيتهم تاني يوم بيتصلوا بيا..معلش اسفين ممكن حضرتك تجيبي البطاقة تاني علشان محتاجينها.. وبرضه بحسن نية عادي جدا رحت واديتهم البطاقة وقالوا لي معلش اصل الموظف نسي يعمل سكان للبطاقة.. طيب ماشي هيشتغل امتى يا سيدي الموضوع ده.. 
بكل ثقة: "لا يا فندم ماتقلقيش ده هيشتغل على طول ومش هيتأخر بس احتياطي ننتظر لبكرة بالليل (ماكسيمم) وهيكون شغال"


طيب مافيش مشكلة.. ولأني بدأت أحس بالغدر شوية قلت اسأل الموظف ده على موضوع الرصيد تاني..


بكل ثقة واسف قال لي: "لا يا فندم الرصيد مش هيتحول.. وياريت تخلصيه قبل ما يتحول"


هه؟! اتنين بيقولوا عكس بعض؟ طيب اصدق مين؟! ما علينا..


استنيت لتاني يوم بالليل ولبعده الصبح.. ومافيش حاجة.. افتكرت كلام الراجل اني لازم اخلص الرصيد.. قلت بس هي دي المشكلة.. أنا بقى اخلص رصيدي كله وأكيد لما اخلصه هيحولوا لي.. قال يا عيني عليا متخيلة انهم خايفين على مصلحتي ومش عايزين يضيعوا لي الرصيد! :)


خلصت الرصيد.. هيييه الحمد لله.. هابقى خط بقى..


وابقى في الشارع وتحصل لي مشكلة كبيرة وامسك موبايلي بكل ثقة علشان اتصل وتطلع لي الست الحنينة بتاعت الرسالة الصوتية وتقول لي عيب تتكلمي وانت مش معاكي رصيد.. رصيد ايه يا ست الحاجة.. صلي على النبي أنا حولت خط خلاص.. تحلف مليون يمين لازم تشحني.. يا ستي اشحن ايه وانا خط.. ولا الهوا.. ومافيش على لسانها غير "يرجى إعادة شحن رصيدك"


طيب اكلم خدمة العملاء علشان ينجدوني في المغرز ده.. ترجع لي الست المحترمة بالرسالة الصوتية اللي حالفة ما تقول غيرها "يرجى إعادة شحن رصيدك"..


يا للهول!!!! حتى كمان خدمة العملاء مش عارفة اكلمها؟! طيب اعمل ايه وأنا في الشارع كده.. ولا عارفة اشحن ولا عارفة اتكلم!! منكم لله.. خربتوا البلد آدي اللي اخدناه من الثورة! (إحم..معلش الجملة دي دخلت من البلوج اللي جنبي.. )


بعد شقلبظات خليت والدي اتصل بيهم.. والحمد لله أشجوني بالرد الفصل اللي حل لي.. برج من نافوخي طبعا مش مشكلتي.. والموظفة اتحفتني بإن الحمد لله مش ظاهر قدامها اساسا ان فيه طلب تحويل!
ازاي يعني؟! امال انا كنت باعمل ايه بقالي يومين؟! كنت باقضي وقت سعيد في المشوار مابين بيتي وبين ممثل الشركة وباديله بطاقتي وبيصورها على سبيل التعارف يعني؟!


الحقيقة الموظفة طمنتني خالص وقالت لي أنهم هيعملوا لي شكوى والناس الوحشين دول هيتعاقبوا ويتذنبوا على الحيط 3 ايام من غير ما ينكدوا على حد من العملا وطبعا دي كارثة لما موظف من موبينيل ما ينكدش على عميل لمدة 3 أيام.. أكيد اعصابه بتتعب.


حسيت بفداحة العقاب وتعاطفت مع الموظفين اللي هيتعاقبوا..بس في وسط شعوري بمأساتهم سألتها طيب وبالنسبة لخطي هيحصل فيه ايه؟ قالت لي لا عادي هيتبعت لك شكوى وفي خلال 48 ساعة هتتحل المشكلة! هو انا لسه هاستنى 48 ساعة؟! اللهم طولك يا روح.. حاضر هاستنى 48 ساعة!!


الحقيقة ماكدبوش خبر.. بعد حوالي 48 ساعة أو يمكن اكتر لقيتهم باعتين لي رسالة على الموبايل بيقولوا لي تم تلقي شكواك وسيتم النظر فيها!! 
نعم؟!!! لسه بعد 48 ساعة هيبدأوا يشوفوا المشكلة؟!!! لا حول ولا قوة إلا بالله.. اعمل ايه بس يا رب.. سبحان من صبرني


انتظرت اكتر من 48 ساعة وقلت علشان بس اعصابي ماتتعبش اديهم وقت اكتر واتصلت بعدها بخدمة العملاء وأنا حاطة ايدي على قلبي..
والمفاجعة كان رد الموظفة أنه لغاية دلوقتي مافيش حاجة اتعملت!!! طيب ايه العمل يا ست.. طلعت لي بحل لوذعي.. قالت لي روحي على أقرب فرع غير اللي روحتيه واعملي طلب جديد وبعدها تستني 24 ساعة وهيشتغل على طول.. اصلنا فريرة في تحويل الخطوط!!!


نعم؟  أروح فرع تاني وابدأ من أول وجديد؟! يا ستي النهاردة انتخابات والدنيا واقفة وصعب حد ينزل.. تقول لي لا مافيش مشكلة بس روحي هتلاقي الفرع مفتوح!


للأسف أنا ماكنتش فاضية.. كان عندي "عرس الديموقراطية" بقى وماقدرتش اضحي واروح فرع موبينيل في هذا اليوم المهيب!!!


تاني يوم كنت جنب الفرع اللي عمل لي الطلب الأسود ده فرجعت لهم.. وماكانوش مصدقين أن كل ده الخط ماتحولش... طيب اسفين يا فندم أو يمكن كان قصده (إسفين) حالا هاكلم لحضرتك الشركة وفي خلال 24 ساعة (ماكسيمم) الخط هيتحول. حضرتك ماتقلقيش وممكن تشحني بس بـ 5 جنيه كافية جدا تغطي لك لبكرة لغاية ما يتحول الخط وتاخدي الدقايق المجانية.. 


آه ياني.. لسه هاستنى.. حاضر.. أمري إلى الله.. 


الحقيقة المرة دي كانوا مجددين لأقصى حد.. على تاني يوم الضهر قطعوا عني الخط تماما! قلت يمكن ربنا رضي عني وحرمني من موبينيل علشان احافظ على صحتي شوية من الهطل ده.. بس للأسف لما رحت لأقرب فرع ليا الست قالت لي هناك.. معلش هي فترة مؤقتة صغيرة جدا بيتم التحويل فيها لكن على بالليل (ماكسيمم) هيكون الخط شغال..


مش عارفة ليه لما سمعت كلمة (ماكسيمم) دي قلبي اتقبض كده وحسيت بكتمة نفس.. بس قلت اللهم اخذيك يا شيطان.. وإن شاء الله كله هيبقى تمام..


طبعا مش محتاجة اقول اني لتاني يوم بالليل الخط ماشتغلش وقعدت يومين من غير موبايل خالص كده.. 


للأسف علشان أنا انسانة وحشة وناكرة لجميل الشركة العظيمة "موبينيل" كنت بدأت اتضايق.. اخص عليا


رحت لأقرب فرع ليا في هذه اللحظة على اساس اني متخيلة اني بتعامل مع شركة كبيرة وأي فرع ليها بيمثلها وكلمتهم كلهم واحدة..


رحت وسألت على مدير الفرع.. بعد ما طلعوني فوق وبعدين نزلوني تحت وبعدين رجعوا قالوا لي معلش هو فوق وانتظرت حوالي نص ساعة قابلني شخص بابتسامة واحترام وقال لي معلش المدير مش موجود بس انا هاحل لحضرتك المشكلة... وعلشان انا واحدة سيئة النية بصراحة تشككت.. بس الراجل اكد لي انه هيحلها لي حالا..
وبعد شوية اجراءات مفروض بسيطة قال لي أني لازم اغير الشريحة والمشكلة هتتحل!!! طيب لما المشكلة بالبساطة دي ماعملوش كده من امبارح ليه؟ طبعا كان الرد ابتسامة وانتهينا
غير لي الشريحة وقلت الحمد لله... كده يا سيدي كله تمام؟ خلاص كدهالخط اتحول؟؟


ماحدش يتصدم.. قال لي لا يا فندم لسه!


بصراحة مش قادرة اقول حالتي كانت عاملة ازاي! 


قال لي بكرة (ماكسيمم) على الساعة 2 هينزل لحضرتك الدقايق المجانية


ايه؟ (ماكسيمم)؟  أنت بتقول  (ماكسيمم)؟! يبقى انت اللي قتلت خطي.. آه يا خطي!!!!!!


بس يظهر الراجل علشان فضل مبستم ومحترم عرف يغطي على الجريمة كويس وقلت انسحب واضحك على نفسي واصدق


تاني يوم الصبح بصراحة فاجأوني برسالة "مرحبا بك في نظام ستار".. ماصدقتش نفسي... قلت ايه ده مش معقول صدقوا اخيرا في كلامهم وكمان قبل "الموعد الموعود".. 


جيت بقى اتكلم علشان اتحكم.. لقيت الست صاحبتنا بتاعت المرة اللي فاتت هي اللي بتتحكم ورجعت تقول لي برضه (برجاء إعادة شحن رصيدكم)


واحلف لها تاني اني بقيت ستار أهو ومعايا الدليل رسالة بخط الموبايل اهو.. وابدا ولا هي هنا!


قلت معلش يمكن بقى على الساعة 2 والرسالة دي كانت كموفلاج.. 


طبعا مش محتاجة أني اقول ان طبعا جت الساعة 2 و3 و4 و5 و6 و7 كمان ومافيش حاجة حصلت..


طبعا أنا مش مفروض ابقى متضايقة خالص ولا متعصبة ولا عندي أي مشكلة.. 


اتضايق ليه يعني؟ هو فيه حاجة تضايق.. دي حاجة لطيفة خالص.. ومفروض اني طبعا ولا افتح بقي ولا اشتكي.. ولو اشتكيت اروح الأول اقدم فروض الطاعة والولاء للموظفين ومانساش ابتسم وأنا باشتكي.. 


تقريبا كتالوج التعامل مع العملاء اللي بيوزعوه على "بعض" الموظفين اللي المصيبة بيطلعوا كمان مديرين بيبقى مكتوب بالصيني أو بيبقى مكتوب بالمقلوب علشان الأستاذ المبجل المحترم اللي اسمه (رامي) من فرع نادي الشمس حد فهمه أن العميل مفروض بعد ما يشوف القرف ده كله يجي ويبقى ماسك اعصابه مهما الموظف يستفزه ويبتسم في وشه ومايبانش عليه انه متضايق خاااااااالص (ده العميل مش الموظف لا حد لا سمح الله يفهم غلط)!!!!!!


وطبعا لما فاجئني بإن بما أن الرسالة اتبعتت لي النهاردة بأنه تم التحويل، يبقى الدقايق هتنزل بكرة (ماكسيمم) ماكانش مفروض أني اتضايق ولا اتعصب خالص واكون باردة تماما وادور على اقرب تلاجة اقعد فيها!


طبعا الاستاذ عمل الواجب وزيادة بدءا من أنه لامني أني ليه اصلا الجأ لكذا فرع وليه اصلا  اكلم خدمة العملاء؟ وليه اصدق خدمة العملاء؟! وطبعا أنا اللي غلطانة واستاهل الحرق اني صدقت كلام اي حد كلمته وإنه مالهوش دعوة بخدمة العملاء 110 علشان دول ادارة تانية.. ومالهوش دعوة بكلام أي حد في أي فرع علشان هو له دعوة بكلامه هو بس.. 


لحظة واحدة بس ممكن اعمل 
Pause
هنا؟!


هو احنا مش بنتكلم على شركة "موبينيل" ولا "أم نبيل" بالظبط؟! يعني ايه شركة بالحجم ده مالهاش دعوة بكلام حد منها؟! 


هو انا بتعامل مع أفراد ولا شركة.. ولا مفهوم المؤسسة ده انا فاهماه غلط؟!!!


طبعا بعد حوار شديد الاستفزاز واسلوب كلام في منتهى قلة الذوق وعدم احترام العميل ولا مبالاة كان ناقص فيه يقول لي اخبطي دماغك في اقرب حيط.. أو هو تقريبا قال لي كده.. علشان لما يقول لي "طيب حصل غلطة ومش ذنبك.. أعمل لك ايه؟!" 
ولما يقول لي "هو حضرتك فاكرة أن علشان بس تقولي "ألو" دي حاجة سهلة؟!!!!" مش عارفة جربت اقول الو الو الو.. لقيتها عادي يعني بس قلت يمكن في موبينيل الوضع بيختلف!!
لما الاستاذ يكلمني كده ويقول لي (أعمل لك ايه؟!) يبقى بالظبط بيقول لي اخبطي دماغك في الحيط!!


شكرا لموبينيل على التجربة الرائعة دي.. وأنا عارفة طبعا أن كل ده لمصلحتي لأني واحدة ضغطها بيوطى.. فهم كانوا عايزين يعالجوني ويرفعوا لي الضغط.. بس بصراحة مش عايزة يجيلي السكر والقلب بالمرة.. فحفاظا على صحتي قررت التخلي عن خط موبينيل وإسناد مهمة إدارة شئون الموبايل لأي من فودافون أو اتصالات.. حسب اللي مش هيحرق دمي اكتر..


وربنا يستر وما اموتش في العملية الانتقالية دي من حرقة الدم في الاجراءات..


دعواتكم.. اصل الفترات الانتقالية دي مش بيحمد عقباها ابدا